Преглед на вестите на светот

Соработник на Ројтерс убиен во напад врз хотел во Украина. Новинската агенција Ројтерс во неделата вечерта соопшти дека убиениот и повредените соработници се дел од шестчлен тим кој бил сместен во хотелот „Сафир“. Хотелската зграда во саботата била погодена од ракета. Убиениот е поранешен британски војник, Рајан Еванс. 38-годишниокот од 2022 година работел за Ројтерс како советник на новинарите за безбедносни прашања, меѓу другото во Украина, Израел и Олимписките игри во Париз. Агенцијата изрази сочувство  до семејството на убиениот.

Украинскиот претседател Володимир Зеленски во својата редовна вечерна видео порака изјави дека „обичен градски хотел“ бил  уништен од руска ракета  од типот Искандер, истакнувајќи дека нападот бил „апсолутно целен и промислен“. Тој изрази сочувство до семејството и пријателите на загинатиот.

Силите на Хезболах синоќа тврдеа дека првиот круг од операциите бил „успешен“ откако групата со седиште во Либан и израелските сили се вклучија во обемна размена на оган долж нивната граница, поради повикот на меѓународната заедница за деескалација на ситуацијата.

Хезболах објави дека лансирал стотици проектили кон Израел како одмазда за убиството на неговиот командант Фуад Шокор во израелски воздушен напад врз Бејрут минатиот месец.

Како одговор, Израел објави дека извршил бројни превентивни воздушни напади насочени кон ракетните фрлачи на Хезболах во јужен Либан. Израелскиот премиер Бенјамин Нетанјаху денеска предупреди дека Израел „не го кажал својот последен збор“ со нападите што ги изврши рано утринава во јужен Либан за да спречи напад од големи размери на шиитското движење Хезболах.

Францускиот суд му го продолжи притворот на основачот на Телеграм, Павел Дуров, кој беше уапсен во саботата на аеродромот во Париз поради наводни прекршувања поврзани со апликацијата Телеграм. Кога ќе заврши таа фаза на притвор, судијата може да одлучи да го ослободи Дуров или да поднесе тужба и да одреди натамошен притвор.

Дуров беше приведен во саботата вечерта на аеродромот во Париз Бурж, веднаш по излегувањето од приватниот авион со кој полетал од Азербејџан. 

Според локалните медиуми, француското правосудство смета дека Дуров е вмешан во бројни злосторства и може да се соочи со обвиненија за тероризам, трговија со дрога, измама и перење пари.