ПЈРМ во грчките учебници за основно училиште се заменува со Северна Македонија

Со одлука потпишана од заменик- министерката за образование на Грција Софиа Захараки, во грчките учебници за основно училиште треба да се направат корекции и терминот „ПЈРМ“ да се замени со „ Северна Македонија“.

Во циркуларното писмо од 16 декември 2020 година, кое го објавија грчките медиуми, а го пренесува МИА, пишува дека врз основа на соодветните одредби, „одлучено е да се коригира терминот „ПЈРМ“ во печатените и дигиталните изданија на учебниците за основно образование, согласно приложениот документ на Министерството за надворешни работи под бр.9382 / 15-2-2019  на тема: „Односите меѓу Грција и Република Македонија-спроведување на Договорот од Преспа во врска со името и терминологијата на соседната земја “.

Корекциите треба да се направат во седум учебници, меѓу кои и учебниците по географија, по англиски и германски јазик, а одлуката е испратена до издавачките куќи надлежни за издавање на конкретните учебници.

На 16 декември 2020 година, како што вчера соопштија од македонското и грчкото МНР, се одржа и Шестиот состанок на Заедничкиот  интередисциплинарен комитет (ЗИКЕ) за историски, археолошки и образовни прашања.

-Расправата се водеше во пријателска и позитивна атмосфера. Двете делегации извршија детална размена на мислења за програмите во образовните системи на двете земји, а во согласност со член 8 став 5 од Договорот од Преспа. Двете страни се согласија нивниот следен состанок да го одржат во февруари 2021 година, пишува во заедничкото соопштение од двете Министерства за надворешни работи.