Најмалку 18 убиени во Авганистан во напади врз провладините сили

Најмалку 18 припадници на авганистанските провладини сили се убиени, а 12 други се ранети во ноќешните напади од страна на талибанците, за ДПА денеска изјавија официјални лица.

Десет лица загинале откако милитантите ги нападнале провладините сили во областа Шолгара, во провинцијата Балк, соопштија провинциските советници Забихулах Какар и Мохамед Ибрахим Каир Андиш. Уште тројца други се повредени во нападот, додадоа тие.

Во јужната провинција Урузган, пет полицајци загинаа, а тројца други се повредени откако милитантите извршиле напад врз безбедносен пункт во главниот град Тарин Кот, изјави портпаролот на провинцијата.

Во западната провинција Бадгис, тројца полицајци загинаа, а шестмина други се повредени во раноутринскиот напад врз безбедносниот пункт во областа Мукор, изјави портпаролот на гувернерот на провинцијата, Неџмудин Бурхани.

Официјални лица тврдат дека жртви имало и меѓу милитантите, но не се даваат никакви бројки.

Портпаролот на авганистанскиот Совет за национална безбедност, Џавид Фајсал, денеска изјави дека бунтовниците во текот на изминатата недела во целата земја убиле 24 цивили, дополни ДПА.

„Мирот бара посветеност да се стави крај на насилството“, објави Фејсал.

Талибанците на последниот ден од февруари во Доха склучија договор со САД, чија цел беше да се отвори патот за размена на затвореници, постапка што веќе е почната, и потенцијални мировни преговори меѓу Авганистанците, потсетува германската агенција.