Мостовите во Кратово поради административни процедури оставени на забот на времето
И по две години откако Сител телевизија укажа на алармантната состојба во која се наоѓа Грофчански мост во Кратово, состојбата денес воопшто не е променета. Овој споменик на културата стар околу 200 години, е оставен сам на себе, со нарушена статика, претставувајќи опасност за граѓаните на Кратово, но и за туристите кои доаѓаат да го видат. Трагично е што Конзерваторскиот центар обезбеди пари за санација уште пред две години, но градежните активности никако да започнат.
-Како што сум известен од директорот на Конзерваторскиот центар, фирма со А-лиценца требало да изврши конзервација на мостот. Но, доаѓа до одложување на конзервација бидејќи ниту една фирма не се нафаќа за толку малку пари да дојде во Кратово и да го санира делот од мостот што е паднат – вели Илија Митевски, директор на Музејот на град Кратово.
Решението за ваквите проблеми Митевски го гледа во создавање на регионален конзерваторски центар за градовите Кратово, Куманово и Крива паланка, кој би бил далеку поефикасен.
Инаку, покрај Грофчански, во многу лоша состојба се и Јоркширски и Радин мост, кои се од непроценливо културно значење за градот Кратово.
-
Оливер Арсовски
Сите содржини од овој новинар