Зголемена стапката на даночно затајување во Грција – на прво место автосервисите

Дигиталните контроли на инспекторите од Независната управа за јавни приходи на Грција (ААДЕ) откриле зголемување на даночно затајување во 2025 година, а просечната стапка изнесува 29,7 отсто, за 2,6 проценти повисока од 2024 година, додека пак на прво место се автосервисите, јави дописничката на МИА од Атина.

Според податоците од ААДЕ, што ги објавуваат грчките медиуми, шест од десет сервиси за автомобили и мотоцикли (61 отсто) затајувале данок, а потоа следат секторот на копнен транспорт и транспорт преку цевководи со 58,1 проценти, дејностите за изнајмување со 56,2 отсто, здравствените услуги со 54 проценти и другите лични услуги со 50,3 отсто.

На пониско, се движат растителното и сточарското производство (40,8 отсто), трговијата на големо (33,9 проценти), угостителските објекти (32,4 отсто), туристичкото сместување (31,6 отсто), трговијата на мало (29,3 проценти), како и прехранбената индустрија (28,8 отсто).

Како што објави државната телевизија ЕРТ, минатата година биле спроведени 47.602 контроли низ целата земја, речиси двојно повеќе од годишната цел одредена на 25.400 контроли, а прекршоци биле откриени во 11.146 случаи.

МИА