Зголемена потрошувачката на вода во Битола

Јавното комунално претпријатие „Водовод“-Битола соопшти дека во овие два дена регистирана е рекордна потрошувачка на вода за пиење.

Според директорот на ЈКП „Водовод“-Битола Горан Стефановски, синоќа во периодот од 18 до 22 часот била регистрирана потрошувачка на вода од 700 литри во секунда.

- Високите дневни температури вообичаено предизвикуваат поголема потрошувачка на вода во попладневните часови кога потрошувачите водата ја користат за разладување но и за полевање со вода на зелените и други површини. Вчера попладне регистриравме потрошувачка од 700 литри во секунда, но проблеми со водоснабдувањето нема бидејќи ги користиме водите од Стрежевско езеро и изворите од планината Баба кои ги полнат резервоарите на нашето претпријатие, потврди Стефановски.

Од ЈКП „Водовод“-Битола информираат дека утре во терминот од 10 до 14 часот без вода ќе биде поголем дел од Нова Битола, односно граѓаните кои живеат на улиците „Васко Карангелески“, „Игњат Атанасовски“, „Ружа Делчева“ и други околни улици во тој дел на градот.

- Станува збор за т.н. средна градска водоводна зона во која екипи на ЈКП „Водовод“ ќе вршат замена на водоводен затворач со голем опфат. Интервенцијата ќе почне во 10 часот и очекуваме да заврши околу 14 часот, потврди директорот на ЈКП „Водовод“-Битола, Горан Стефановски.