Зеленски: Запирањето на руската инвазија е клучно за целиот свет

Украинскиот претседател Володимир Зеленски рече дека исходот од војната во неговата земја влијае не само врз Украина, туку и на иднината на меѓународниот поредок.

– Токму на боиштата на Украина се решаваат идните правила на овој свет, рече тој.

Говорејќи преку видео-врска на азискиот безбедносен самит во Сингапур, Дијалог Шангри-Ла, тој рече дека неговата земја се обидува да ги истисне Русите од областите што ги контролира уште од почетокот на војната.

Тој додаде дека украинските сили исто така се бранат од жестоки руски напади на истокот на земјата, особено околу градот Северодоњецк.

Истакнувајќи ја досегашната поддршка од Западот и азиските сојузници, Зеленски рече дека е клучно земјите што испраќаат помош да не попуштат.

Тој, исто така, нагласи дека Русија ги блокира пристаништата во Црното Море и Азовското Море, задржувајќи го украинскиот извоз на храна до светскиот пазар.

– Ако не можеме да ги извезуваме нашите прехранбени производи, светот ќе се соочи со акутна и тешка прехранбена криза и глад во многу земји во Азија и Африка, истакна Зеленски.