Здружение на пензионери во Центар: Се надеваме дека одличната соработка со Герасимовски ќе продолжи

Здружението на пензионери на Општина Центар изрази надеж дека добрата соработка со актуелниот градоначалник на Центар, Горан Герасимовски, ќе продолжи и во иднина. Тие информираат дека на вчерашната средба размениле повеќе идеи и предлози за подобрување на условите за пензионерите во општината. На својот официјален Фејсбук-профил, здружението напиша:

„Денес градоначалникот на Општина Центар беше во работна посета на здружението, каде што имавме можност да размениме повеќе идеи и предлози околу подобрување на условите за живот на пензионерите во Општина Центар.

Се надеваме дека одличната соработка со Општина Центар, а особено со градоначалникот, ќе продолжи и во иднина“, стои во нивната објава.

Инаку, Општина Центар е меѓу општините со најголем број пензионери. Герасимовски во изминатиот мандат посвети многу проекти на оваа група граѓани, а за следниот мандат негово главно ветување е изградба на модерен општински дом за возрасни лица, каде што цената би била симболична за повозрасните од Центар.