Македонија
8. August 2021 - 9:56

Заев: Донесени низа одлуки за рационално распоредување на силите

Владата донесе неколку одлуки поврзани со пожарите кои ќе важат и за беровско-пехчевскиот регион и во Старо Нагоричане, каде иако пожарот беше угаснат со засилување на ветерот повторно стои огнот. Премиерот Зоран Заев кој од утрово е во беровскиот регион очекува денес или најдоцна до утре пожарот кај Будинарци да биде угаснат.

-Сепак тлеат, боровите шуми се опасни, смолата си го прави своето. Важно е да знаат граѓаните дека ги регулиравме сите оние детали околу обезбедување и рационално распоредување на силите, мораме и овие пожарникарите наши, војската, полицијата, шумските професионалци кои работат да направиме рационален распоред, заради тоа што летото е секако пред нас, рече Заев во својата изјава за МИА.

Додаде дека се регулирани сите одлуки околу прелетите на странските воздухоплови.

-Донесени се одлуки за користење на нашето небо, нормално за да не се плаќа, регулирани се постапките, за како да се плаќа таксата околу ТАВ аеродромот, донесена е одлука за соодветните резерви да се обезбедат околу керозинот и во гориво во нафта и другите ресурси, дополнително по проценка и на Штабот на Центарот за управување со кризи за одредени алатки кои што мораат навремено да бидат обезбедени, а се потрошени овие денови и слични други одлуки кои што се важни, додаде премиерот.

Порача сите да бидат целосно фокусирани на она што се случува и нагласи дека дефинитивно Берово останува место каде е најголемиот пожар во државата, што според него не значи дека до крајот на денот може да настане и друг поголем пожар.

-Температурите се исто така високи, да се надеваме дека ветрот ќе намали затоа што ветрот е предизвикувач на масовноста на опожарувањето на шумите. Со целокупниот распоред на сите наши сили потпомогнати од странците кои што се овде, уште еднаш кога ги спомнуваме упатуваме благодарност до Австријците, до Словенците, до Бугарите, до Србите, до сите кои што ни помагаат, денеска ќе прават тури, интервенции и романските авиони, се очекува и вториот авион денеска да стигне, вчера интервенираше и првиот воздухоплов од Романија, секако се работи за професионалци луѓе кои што верувам дека ќе бидат од огромна помош, додаде премиерот Заев.

Дефинитивно е месец на пожарите, денес е ,,Св.Петка”, јас сум православен верник нека од биде од помош на сите граѓани, но и на сите што ни помагаат околу овие ризици и да се надеваме дека се повеќе и повеќе ќе бидат ставени под контрола сите пожари во државата, рече на крај од својата изјава македонскиот премиер.

Во контекст на неговата изјавата, директорот на Центарот за управување со кризи, Стојанче Ангелов додаде сека Главниот штаб на Центарот за управување со кризи има извонредна комуникација со Владата.

-По наше барање Владата одржа итна седница, работите кои што ги кажа премиерот беа веднаш обезбедени, потребните одлуки беа донесени. Јас како раководител на тој главен штаб и на целата оваа кризна состојба сум во постојана комуникација со премиерот и на мене ми е сеедно дали премиерот е овде во Скопје или на било кое друго место. Од првиот пожар досега сме во постојана комуникација и секогаш кога имало потреба премиерот да се ангажира во одредена работа сум можел да го добијам во истиот момент, рече Ангелов

Ангелов брифираше и за моменталната ситуација со пожарите во државата.

-Моментално имаме пожари во Прилеп кај село Дрен и село Смолани кој што е ставен под контрола и моментално се догасува и верувам денес ќе биде локализиран. Покрај него имаме пожар во Велес кај село Џимирци, но тој се префрла кај Скопскиот регион во селото Круш и селото Дивје и овој е малку покомплициран, бидејки се работи за непристапен терен. Во Скопје гори кај Сарај, таму е реактивиран пожарот кај Раовиќ и село Буковиќ и верувам дека денес ќе биде ставен под контрола и повторно имаме пожар во Старо Нагоричане и тоа кај селото Љубино и Дренак, кој што повторно се активирани рече директорот на ЦУК.

Состојбата како што додаде е целосно под контрола освен во Беровско за кој нагласи дека е важно да се каже дека на ниту едно место, нити еден човек не е загрозен поради што апелираше пред се да се внимава на човечките животи бидејки пожарите ќе се изгаснат.

Градоначалникот на Берово, Звонко Пекевски потврди дека нема повредени во пожарот во Беровско и информираше дека синоќа заседавал Општинскиот кризен штаб на кој се донесени понатамошни одлуки за координирано дејствување со помагателите од повеќе земји кои го гаснат пожарот во Беровско.