Второто полугодие во Прилеп почна без проблеми

Второто полугодие во основните и средните училишта во Прилеп почна без проблеми, информираше прилепскиот градоначалник Марјан Ристески кој денеска присуствуваше на првиот училишен ден во прилепското основно училиште „Кире Гаврилоски“.

- Сите ученици навреме пристигнаа во училиштата, и во основните и во средните во градот и во населените места. Учениците кои користат превоз навреме стигнаа. За сите основни и средни училишта има обезбедено доволни количества нафта и огревно дрво до завршувањето на грејната сезона. Обврската за темелна дезинфекција во училишните објекти поради грипот и вирусните настинки е завршена, во соработка со Центарот за јавно здравје, така што во општина Прилеп без проблеми стартуваше второто полугодие од учебната 2016/2017 година. Ние, заедно со директорите на училиштата и со наставничкиот кадар, ќе настојуваме да нема никакви пропусти во одвивањето на наставно-образовниот процес, изјави Ристески.

Второто полугодие во Прилеп го почнаа над 14200 основци и средношколци. Двата дена од продолжениот зимски распуст учениците ќе треба да ги одработат во саботите, едниот ден во март, другиот во април за да се исполни вкупниот фонд од 180 наставни денови во учебната година.