Врховниот суд на Панама издаде налог за апсење на поранешниот претседател Рикардо Мартинели

Врховниот суд на Панама вчера издаде наредба за апсење на поранешниот претседател на земјата Рикардо Мартинели, осомничен за користење на државни средства заради нелегално шпионирање на над 150 лица, пренесува БТА.

Мултимилионерот, кој ја напуштил Панама во јануари и живее во Мајами, исто така е предмет на шест истраги за корупција.

Мартинели беше претседател на Панама од јули 2009 до јули 2014 година. Тој беше заменет на функцијата од Хуан Карлос Варела, кој уште во 2011 година, кога беше министер за надворешни работи и потпретседател го обвини за корупција и обиди за манипулација на законодавната и судската власт.