Во затворските ќелии во Франција ќе се воведат фиксни телефони

Во 178 затвори во наредните три години ќе бидат воведени фиксни телефонски линии.

Според тоа, затворениците речиси во секоја затворска ќелија ќе можат да обавуваат приватни разговори, со тоа што на располагање ќе им бидат само броеви претходно одобрени од судија или од затворската управа.

Министерката за правда Никол Белубе одлуката за воведување телефони во затворите ја донела на основа на експеримент спроведен летото 2016 година во затворот Монмеди во Меза.

Во тој затвор 290 затвореници веќе имаат лична фиксна линија и повеќе не мора да телефонираат од говорниците кои се наоѓаат во внатрешниот двор за прошетка или во ходниците, кои често се преполни и бучни.

„Фигаро“ наведува дека затворениците може да имаат по 20 контакти во именикот.

Целта на оваа мерка е да се овозможи поголем пристап до телефоните и да се подобри доверливоста на телефонските разговори „за да се поттикне одржувањето на семејните врски и да се спречат самоубиства“.

Сега времето за телефонирање е ограничено на неколку часа дневно, а во некои затвори има само еден телефонски апарат на 100 затвореника, што доведува до меѓусебни тензии.

Со новата мерка како позитивен ефект се покажа и намалувањето за 31 отсто на употребата на мобилните телефони, кои се забранети во затворот.

Затворската управа, одговарајќи на скептиците во однос на можноста за злоупотреба при користењето фиксни телефонски разговори, истакнува дека секој повик се регистрира и контролира и дека во случај на кршење на правилата ќе бидат преземени казнени мерки.