Во Велес вирусот присутен и во некои од јавните институции

Во Велес Ковид 19 го има во некои од јавните институции како ЈКП „Дервен“ каде во Работната единица „Хигиена“ има двајца заболени и шест вработени сe во самоизолација, двајца позитивни на вирусот има и во Работната единица „Водовод и канализација“, а двајца во самоизолација.

Градоначалникот Аце Коцевски на денешниот прес информира дека во Општина Велес од вчера има еден болен од јавната администрација кој се наоѓа во велешката болница, еден има симптоми и чека резултати од тест, а еден е во изолација. Претходно заболениот од јавната администрација на Општина Велес  се излекувал и веќе е на работа, информира Коцевски.

-Го чекаме записникот од синоќешната седница на Владата во врска со работата на општинската администрација, имаме три модели меѓу кои треба да бираме или ќе ги комбинираме. Дополнително ќе донесеме одлука на кој начин ќе продолжи понатаму да работи општинската администрација, најави Коцевски.

Во ЈЗУ Општа болница има позитивни три медицински сестри од Инфективно одделение, еден од анастезиолошката служба и еден од администрација.

Во ЈЗУ Здравствен дом позитивни на Ковид-19 се две лица, а пет се во изолација, информира Коцевски.

Тој апелира до граѓаните задолжително да носат маска, да држат пропишано растојание и да не се групираат со цел да се спречи понатамошното ширење на вирусот.