Македонија
1. September 2020 - 11:52

Во Тиквешко се бере грозје и ноќе на светлина од рударски ламби

Во Тиквешко се бере грозје и ноќе на светлина од рударски ламби. Ова го потврдија денеска од Здружението на македонски енолози за МИА, нагласувајќи дека ноќната берба има одредени предности од енолошки  аспект, кога се работи за бели сорти на грозје.

Но, исто така, ноќната берба претставува и своевидна авантура и атракција, па е потенцијал за идна промоција при развојот на винскиот туризам во најголемиот лозарски регион во државата.

-Ноќната берба се практикува во модерното винопроизводство, посебно во земји каде ноќите изладуваат и до минусни темепратури, а дневните температури се околу 30 степени. Кај нас има високи дневни температури и за среќа, ноќите во август изладуваат. Токму тоа треба се искористи, кога ноќите се ладни и темперарурата е некаде под 15 степени целзиусови, тоа време може да се искористи за берба на белите сорти, појасни Елена Богева, потпретседател во Здружението.

Таа додаде дека најчесто, во модерното винопроизводство, бербата на грозје е со комбајни и тоа  беспрекорно може да се одвива ноќе.

-Како земја со топла клима и со високи дневни темепратури, ова е добра идеја да се практикува и кај нас, кога ноќе температурите се спуштаат под 15 степени и грозјето изладува за брзо, нагласи Богева.