Во Куманово ќе се одржи 10. „Рома Труба Фест 2015“

На градскиот плоштад во Куманово, во вторник ќе се отвори 10.  јубилеен Меѓународен фестивал на дувачки оркестри „Рома Труба Фест 2015“, најави денеска организаторот на фестивалот, ансамблот на народни ромски игри и песни „Рушит Шаќир“.

На годинашниов фестивал ќе настапат пет дувачки оркестри и пејачи од Македонија и соседна Србија. 

- Оваа година имаме исклучително богата програма со реномирани гости. Се потрудивме да извлечеме максимум од сите оркестри, бидејќи годинава фестивалот нема натпреварувачки, туку ревијален карактер. Како и секоја година и оваа очекуваме посетители, не само од Куманово, туку и од соседните градови, изјави директорот на фестивалот Самет Салиевски.

Последниве неколку години, како што рече Салиевски, фестивалот го поддржува и Министерството за култура.

Манифестацијата, воедно е дел од годишната програма на секторот за култура за 2015 година и се одржува под покровителство на градоначалникот и Советот на општината.