Во Крива Паланка промовирана збирка раскази од Каролина Алексовска

Збирката раскази „Копнежот за тебе и последната надеж“ од Каролина Алексовска беше промовирана во Центарот за култура во Крива Паланка.

Ова е прва книга на младата Каролина Алексовска од Крива Паланка. 

- Со оваа промоција ја заокружуваме годинашната програма на нашиот Центар од областа на книжевната и библиотечна дејност, која покрај останатите активности во текот на годината значаен простор отстапува и на младите автори од градот. Промовиравме повеќе дела од млади крвиопаланечки поети и раскажувачи, а тоа прерасна во своевиден натпревар на млади книжевници, рече директорот на Центарот за култура Александар Рангелов. 

Во збирката се содржани педесетина раскази со љубовна тематика.

Професорката по македонски јазик Лилјана Стојановска рече дека собраните прозни дела се всушност миговни лирски записи на младата и емотивна Каролина.

- Ги создаваав во краток временски период расказите, при наплив на емоции од една голема љубов, која беше моја инспирација и водилка, рече авторката Алексовска.

До крајот на 2016 година во Центарот за култура ќе се одржи концерт на класична музика на музичката паралелка при ООУ „Јоаким Крчовски“, под менторство на проф. Лариса Жулина – Митовски и новогодишна претстава за дечињата, во изведба на членовите на драмското студио, а во режија на Глигор Цветковски.