Во Кавадарци 80 болни од грип, во Неготино ниту еден

Осумдесет лица заболени од сезонски грип се пријавени во Центарот за јавно здравје од Кавадарци оваа сезона, а во Неготино засега нема регистрирано ниту едно грипозно лице, информираа денеска докторите Ристе Јовановски и Иванка Тодоровска.

- Според нашите податоци состојбата со грипот е во благ пораст бидејќи само во изминатата седмица се евидентирани 19 грипозни  наспроти претходните седмици кога беа пријавувани по 3,7 или 8 грипозни лица. Уште сега бројката на заболени со грип ни е дупло повеќе од истиот период минатата година. Се очекува бројката на заразени од сезонски грип да расте со почетокот на второто полугодие во училиштата кога и раздвиженоста на учениците ќе биде поголема, рече Јовановски од Центарот во Кавадарци.

Јовановски и Тодоровска нагласија дека службите и понатаму ќе ја следат состојбата со грипот во овие два града.