Во исчекување на стартот на Мундо-баскет

 

Утре во осум кинески градови, започнува Светското кошаркарско првенство на кое за прв пак ќе учествуваат 32 репрезентации поделени во осум групи. 

 

Првата фаза од турнирот ќе трае од 31 август до 5 септември. Најдобрите две репрезентации од секоја група ќе се пласираат во следната рунда, во која ќе бидат формирани нови четири (осминафинални) групи, додека трето и четврто пласираните ќе разигруваат за пласман од 17 до 32 место.

 

Нокаут фаза ќе започне со четвртфиналните натпревари на 10 септември.

 

Полуфиналните дуели се закажани за 13 септември, а мечот за трето место и големото финале се играат на последниот ден, на 15 септември.

 

Главните фаворити за титулата се актуелните шампиони Американците, кои мака мачеа со составување на тимот кој ни од далеку не наликува на популарниот „Дрим Тим“. Затоа таквата шанса ќе обидат да ја искористат пред се Србите кои играат фантастично во подготвителниот период, како и Грците предводени од Јанис Антеткумпо. 

 

Шанса ќе бараат и селекциите на Шпанија и Австралија, како и традиционално добриот состав на Франција. 

 

Најмногу учесници има Европа 12, а по неа со осум следуваат Азија и Океанија, седум доаѓаат од Јужна и Северна Америка, а пет од Африка.

 

Група А: Брегот на Слоновата Коска, Полска, Кина, Венецуела

Група Б: Русија, Аргентина, Република Кореја, Нигерија

Група Ц: Шпанија, Иран, Порторико, Тунис

Група Д: Ангола, Филипини, Италија, Србија

Група Е: Турција, Чешка, САД; Јапонија

Група Ф: Грција, Нов Зеланд, Бразил, Црна Гора 

Група Г: Доминиканска Република, Франција, Германија, Јордан 

Група Х: Канада, Сенегал, Литванија, Австралија