Во Гевгелија лани собрани помалку единици крв од планираното

Општинскиот Црвен крст од Гевгелија на полето на крводарувањето во 2015 година потфрли за нешто повеќе од 30 отсто, па така наместо планираните 984 биле собрани 645 крвни единици, информираа денеска надлежните служби.

- Од постигнатиот резултат, иако нецелосен како до сега, сепак мора да бидеме задоволни затоа што во неговата нецелосна реализација голем влог има бегалската криза од која ние се најдовме меѓу најпогодените. Нашите активисти и медицинските екипи беа и се уште се ангажирани по цел ден во ПТЦ Гевгелија така што од планот не успеавме да спроведеме три акции кои беа планирани токму во тој период. Со нив резултатот сигурно ќе беше многу подобар, рече секретарот Младен Бундов.

Стивнувањето на бегалскиот бран, според Бундов, овозможил оваа година добро да почне па до сега, како што рече, се собрани повеќе од 50 крвни единици од акцијата што беше реализирана во Богданци.