Во Берово погребално претпријатие откопувало гробови, човечките остатоци ги фрлало на друга локација

Погребално претпријатие во Берово ископувало стари гробови и остатоците од починатите лица ги фрлало на друга локација, соопшти СВР Штип.

Според информациите од ОВР Берово, пред два дена, на местото викано „Црвени брегови“, во атарот на Берово, бил забележан лиценциран извршител за погребални услуги како фрла и закопува човечки остатоци на градежна депонија. По добиената пријава, во координација со јавен обвинител, бил извршен детален претрес на локацијата со механизација од Јавното комунално претпријатие. Првичните резултати не откриле докази за кривично дело, но биле пронајдени градежен шут и отпад.

Сепак, по дополнителна истрага, полицијата дошла до сознание дека истиот извршител во повеќе наврати вршел ископ на стари гробови и остатоците од починатите ги префрлал на друга локација.

Подоцна бил извршен увид и на гробиштата во селото Смојмирово, каде на јужната удолница биле пронајдени пет коски што наликуваат на човечки.

По целосно расчистување и документирање на случајот, надлежните ќе поднесат соодветна пријава против одговорните лица.