Во автобусите на ЈСП Скопје од денеска се плаќа и со мобилен на ВИП

ЈСП Скопје информира дека после успешното тестирање на системот, од денеска во функција ќе биде ставено и плаќањето со мобилен телефон за претплатниците од ВИП операторот.

Со ова се комплетира можноста на сите граѓани да можат да ги користат услугите на јавното претпријатие, со што се овозможува полесно плаќање на билетите и за оние лица кои не толку често го користат јавниот превоз.

Оваа услуга ќе може да се користи откако ќе се активира услугата. Поточно, прво се праќа бесплатна СМС порака на бројот 14 11 14, со текст START, со што оваа услуга станува активна. Активацијата се прави еднократно.

Кога претплатничкиот број е веќе активиран, плаќањето се врши само со вртење на бројот 185. Откога ќе се добие сигналот, телефонот се доближува до валидаторот. Плаќањето трае неколку секунди, со што претплатникот добива повратна СМС порака дека плаќањето е успешно. Оваа порака, корисниците на јавниот превоз се должни да ја чуваат до крајот на нивното возење.

ЈСП Скопје ги информира и корисниците на броеви од Македонски Телеком дека овој оператор ја исклучи активацијата за оваа услуга, што значи дека граѓаните немаат потреба од нејзино активирање, туку веднаш можат да пристапат кон плаќање на билетот во автобус со вртењето на бројот 185.