Во акцијата за чистење на Скопје отстранети 2.754 кубни метри смет од дивите депонии

Над 2.500 кубни метри смет се отстранети од дивите депонии во Скопје во рамки на Акцијата за чистење што се спроведува во сите скопски општини. Досега екипите на јавните градски претпријатија ги исчистија улиците и јавните површини во општините Аеродром, Бутел, Гази Баба, Кисела Вода, Центар, Чаир и во Шуто Оризари. Последниве два дена акцијата се спроведува во општината Карпош, а во текот на наредните денови работите ќе се преселат во општините Ѓорче Петров и Сарај.

- Целта на оваа голема акција е чистење и миење на улиците од прашината која со години се таложи и претставува една од краткорочните мерки за намалување на загадувањето во градот. Екипите на јавните градски претпријатија засилени со дополнително ангажираните работници деновиве ги метеа и ги миеја градските улици и булевари, ги расчистуваа јавните површини од отпадоци, ги отстрануваа дивите депонии, ги чистеа шахтите, сливниците и канализациската мрежа, ги кастреа гранките на дрвјата и го чистеа зеленилото, информираат од Град Скопје.

Како што наведуваат во соопштението во општината Аеродром се расчистени 400 кубни метри смет од дивите депонии, од општината Бутел се отстранети 500 кубни метри диви депонии, од општината Гази Баба - 734 кубни метри смет, од општината Кисела Вода -  150 кубни метри отпад, во општината Центар - 120 кубни метри смет, од општината Чаир - 150 кубни метри отпад, а во општината Шуто Оризари се расчистени диви депонии со зафатнина од 700 кубни метри. Или вкупно, досега се отстранети 2.754 кубни метри смет од дивите депонии.

Со акцијата за чистење се опфатени сите 10 општини во Скопје. Акцијата се очекува да трае 20-ина дена. По завршувањето на чистењето на улиците, работните активности ќе продолжат на кејот на реката Вардар.

За оваа акција Град Скопје ангажираше неколку стотини невработени лица кои се повикани во соработка со Министерството за труд и социјална политика и Агенцијата за вработување на Република Македонија.