ВМРО-ДПМНЕ: СДСМ ја продолжува кризата во државата

СДСМ ја продолжува кризата во државата, а со тоа го оневозможува реализирањето на проектите содржани во програмата „Реално“ за коишто гласаа мнозинството граѓани во Република Македонија, истакна денеска на прес-конференција Лука Кржалоски од ВМРО-ДПМНЕ.

СДСМ со своето неодговорно однесување, посочи тој, ги опструира многуте проекти коишто се во интерес на граѓаните. Нагласи дека еден од проектите кој требало да отпочне годинава е проектот „За рестартирање на стопанските кацитети – жртви на транзицијата“.

- Со овој проект треба да се реши статусот на повеќе од 320 компании чии имоти пропаднаа во транзицијата создадена и спроведена од СДСМ. Преку законските измени кои што се предвидуваа треба да им се овозможи на идните купувачи на имотот од друштвата да ги рестартираат и да ги стават во функција за вршење стопанска дејност, истакна Кржалоски.

Потенцира дека за овој процес предвидено е да се понуди државна помош со цел креирање на што е можно повеќе работни места, со акцент на ангажирање на поранешни вработени – стечајци.

За креирање на секое работно место, појасни, предвидено е државна помош од 2.000 евра, а за ангажирање на стечајни работници 4.000 евра под услов да се задржат на работа минимум 5 години.

- Дополнително пакетот мерки, предвидува и готовински грант во изност од 10 отсто од инвестираната вредност за адаптација, реконструкција и набавка на опрема. Исто така се предвидува ослободување на плаќање данок на добивка во рок од 2 години, а персонален данок и социјални придонеси во рок од 3 години доколу вработените лица ги задржи најмалку уште 3 години, рече Кржалоски.

Според него, со овој проект и низата други бенефиции кои инвеститорите во стопанските капацитети – жртви на транзицијата ќе ги добиваат, ќе овозможат да се исправи една социјална и историска неправда којашто над 200.000 работници ја доживеале во време на владеењето на СДСМ. СДСМ, истакна, веќе две ипол години ја држи Македонија во заложништво, а со тоа ги кочи процесите за стопански и економски развој на државата. 

- ВМРО-ДПМНЕ ќе продолжи и покрај бројните опструкции да работи во
интерес на македонските работници и македонското стопанство, а со тоа да придонесува во унапредувањето на стандардот на граѓаните, но пред се во намалувањето на невработеноста. Благодарение на досегашните позитивни економски политики, стапката на невработеност од катастрофалните 39% во време на СДСМ, се намали на рекордно ниски 23,4 отсто. Односно се отворија над 170.000 нови работни места. ВМРО-ДПМНЕ тоа што го ветува, тоа и го реализира, додаде Кржалоски.