Вирусните инфекции ги полнат амбулантите во Прилеп

Акутните вирусни респираторни инфекции со слични симптоми на грип косат во Прилеп. Најмногу се погодени децата од 0 до 6 години, како и училиштата каде се случува во некои класови да само по некоку деца. Според Центарот за јавно здравје од овој град бројот на пациенти кои ги имаат овие вирусни заболувања е покачен бидејќи оваа зима има преклопување на сезоната од ковид, грип и на останати вирусни респираторни инфекции. Овие заболувања имаат слични симптоми и нивно докажување е можно само со лабораториско испитувања.

„Ние ги следиме заболувањата грип или заболувања кои личат на грип, но ги следиме и двете групи на респираторни вирусни инфекции како акутните респираторни инфекции на горните дишни патишта и акутните респираторни инфекции на долните дишни патишта“, изјави Татјана Станимировиќ, раководител на епидемиологија во Центар за јавно здравје Прилеп.

И матичните лекари вечат дека притисокот врз нив во последниот период е многу зголемен токму поради овие акутни вирусни респираторни инфекции.

„Има наплив на вирусни инфекции со температури, кашлици, зголемен е бројот и на возрасни, а посебно на деца кои одат на училиште. Притисокот врз амбулантите е голем. На пациентите може да им порачам да земаат витамини, парацетамоли, на вирусот антибиотик не делува, така што треба да има повеќе домашна нега и одмор“, вели Д-р Рената Керпичоска, матичен лекар.

Во Македонија од почетокот на сезоната, односно месец октомври имало регистрирано 209 заболувања на грип и според досегашните бројки активноста на грипот била со низок интензитет и спорадична раширеност низ државата.

„Оваа година грипот започна нешто порано, обично првите случаи се регистирале кон крајот на месец декември. Кај нас во Прилеп пријавени се досега само 19 случаи од заболувања на грип и заболувања слични на грип, најмногу се во возрасната група од 15 до 64 години“, додаде Станимировиќ.

Според Центарот за јавно здравје грипот допрва треба да го достиген својот пик во Македонија, а тоа се месеците јануари и февруари.