Вакцинацијата против сезонски грип почнува задутре

Вакцинацијата против сезонски грип во целата држава ќе почне в среда (18 октомври) и ќе се врши во центрите за јавно здравје и нивните подрачни единици. Вакцината ги покрива типовите вирус на грип кои циркулираат во северната хемисфера, соопшти Министерството за здравство.

Вакцината ги покрива типовите вирус на грип кои циркулираат во северната хемисфера, вклучувајќи го европскиот регион и Македонија, подготвена е согласно препораките на СЗО и штити од два типа на вируси од групата A и еден тип на вирус од групата Б, а производител е Абот од Холандија, стои во соопштението.

Вакцинацијата е единствена превентивна заштитна мерка против грип и се препорачува за лицата над 65 години, особено хронично болните лица, мали деца под три години со намален имунитет, здравствени работници, лица со кардиоваскуларни и респираторни заболувања, како и воопшто за лица со намален имунитет. Вакцината против грип е незадолжителна вакцина и се дава на доброволна база.

Од Министерството информираат дека цената на вакцинацијата против сезонски грип изнесува 400 денари, како и минатите години.