У-21: Македонија со нова победа на врвот!

Младата фудбалска репрезентација на Македонија направи уште еден чекор кон освојување на едно од првите две места во квалификациската група за пласман на Европското првенство во Полска. Македонија, во вторникот, ја совлада Северна Ирска со 2-0 и со 18 бодови се наоѓа на првата позиција во групата.

Избраниците на селекторот Благоја Милевски, одиграа уште еден одличен меч, ја контролираа играта, а головите ги постигнаа во финишот на првиот, односно вториот дел.

Аврамовски во 37. минута нафрли од левата страна, а ирскиот дефанзивец Доерти несмасно интервенираше и ја затресе сопствената мрежа. Во самиот финиш на мечот Маркоски со соло акција ги постави конечните 2-0.

Македонија по девет одиграни натпревари е прва во Групата 3 со 18 бодови, бод повеќе од Франција која славеше над Исланд со 2-0. Исланѓаните се на третата позиција со 15 бодови и натпревар помалку од Македонија и Франција.

Во последното коло Македонија на 8. октомври ќе ја пречека Шкотска.