Турција испраќа авиони Ф-16 во Естонија за заштита на воздушниот простор над Балтикот

Турските воздухопловни сили повторно ќе придонесат во мисиите за безбедност на воздушниот простор над Балтикот со распоредување на пет борбени авиони Ф-16 и и екипаж од 76 лица во Естонија, објави турскиот весник „Хуриет дејли њуз“.

Турскиот контингент, кој е дел од 181-та ескадрила на воздухопловните сили со седиште во Дијарбакир, позната и како ескадрила „Пантер“, ќе биде стациониран во воздухопловната база Амари во Естонија.

Турскиот контингент ќе извршува мисии под команда на НАТО од август до ноември, обезбедувајќи 24-часовен брз одговор на потенцијални нарушувања на воздушниот простор над балтичкиот регион.

Балтичката воздушна патролна мисија на НАТО е постојана мирновременска операција, што ја обезбедува безбедноста на сојузничкиот воздушен простор преку постојано присуство на борбени авиони и екипажи во 24-часовна подготвеност за брз одговор. Таа е во функција откако Естонија, Летонија и Литванија се приклучија на НАТО во 2004 година.

Мисијата беше проширена во 2014 година откако Русија го анектираше Крим. Во мисијата учествуваат повеќе од десет борбени авиони од три земји-членки на НАТО на ротациона основа, кои полетуваат од два аеродрома во балтичките држави.

МИА