Трамп: Ниту еден американски претставник нема да патува на самитот Г20 во Јужна Африка

Американскиот претседател Доналд Трамп изјави дека ниту еден американски претставник нема да патува на самитот на Г20 во Јужна Африка подоцна овој месец, наведувајќи дека Африканерите „се убивани и масакрирани“.

– Целосен срам е што Г20 ќе се одржи во Јужна Африка. Африканците (луѓе кои потекнуваат од холандски доселеници, како и од француски и германски имигранти) се убиваат и масакрираат, а нивната земја и фарми нелегално се конфискуваат. Ниту еден владин претставник на САД нема да присуствува сè додека продолжуваат овие злоупотреби на човековите права. Со нетрпение очекувам да бидам домаќин на Г20 во 2026 година во Мајами, Флорида, напиша Трамп на неговата платформа Truth Social.

Претходно Трамп изјави дека потпретседателот на САД, Џеј Ди Венс, ќе отпатува во Јоханесбург за самитот на Г20 со шефови на држави и влади. Трамп ја остави својата лична одлука за учество на овогодишниот самит отворена, поради политички несогласувања со домаќинот, пренесе ДПА.

Јужна Африка годинава го има претседателството со групата на водечки индустриски и земји во развој (Г20). Групата вклучува 19 земји, Европската Унија и Африканската Унија.

Во мај, на состанок во Овалната соба, Трамп јавно упати обвинувања за „геноцид“ против белите фармери до јужноафриканскиот претседател Сирил Рамафоса. Експертите и јужноафриканската влада го негираат претставувањето на наводен „бел геноцид“.

Претходно годинава, САД прифатија прва група бели Јужноафриканци и им доделија статус на бегалци. Во почетокот на февруари, Трамп веќе ја замрзна помошта за Јужна Африка, а во март САД го протераа јужноафриканскиот амбасадор.

МИА