Тилерсон се сретна во Анкара со Ердоган и Јилдирим

Американскиот државен секретар, Рекс Тилерсон и турските официјални претставници денеска разговараа за начините за координација во борбата против групацијата Исламска држава во Ирак и Сирија. 

Разговорите во Анкара се одржаа еден ден откако Турција објави дека завршува операцијата „Еуфратски штит“ во Сирија, која почна во август.

Во соопштение од канцеларијата на турскиот премиер Бинали Јилдирим не се спомнати различните ставови на Турција и САД за улогата на курдските сили во кампањата против ИД, при што е посочено само дека двете сојузнички во НАТО се договориле да ја зајакнат соработката по регионалните прашања.

Тилерсон, кој се сретна и со претседателот на Турција, Реџеп Таип Ердоган по разговорите со Јилдирим, посочи дека го потенцирал значењето на Турција за американската безбедност и за економските врски во регионот. 

Планирано е Тилерсон да се сретне и со министерот за надворешни работи на Турција, Мевљут Чавушоглу.