Телото на Дамјан пронајдено во река - Причината за смртта е непозната

 

Телото на 35 годишниот Дамјан Неделковски кој се водеше за исчезнат од ноември минатата година е пронајдено во неделата во река во Северна Дакота.

 

Телото е пронајдено од локален рибар во реката Канонбол. Аутопсијата на телото не покажала никакви повреди, па затоа властите не се сомневаат дека станува збор за убиство, иако засега причината за смртта е непозната.

 

Шерифот Кајл Кирчмаер на прес-конференција изјави дека засега не се знае колку долго телото на Неделковски било во реката, но претпоставува дека тоа не било многу време оти бил пронајден облечен во фармерки, маичка и патики.

 

-Тоа се само моите претпоставки работејќи со вакви случаи во минатото… телото не е доволно распаднато за временски период од 5 месеци, колку што би требало да биде во вода, изјави Кирчмаер.

 

Според него, Неделковски последен пат бил во контакт со неговите пријатели и семејството некаде околу 26 октомври, а неговиот полубрат за исчезнувањето пријавил дури на 16 ноември.

 

Неделковски по потекло е од Република Македонија, а заедно со неговото тело пронајдена е македонската лична карта, соопшти шерифот.

 

Шерифот вели дека истрагата се уште трае и дека надлежните треба да откријат повеќе детали и во врска со движењето на Неделковски.