Тачи: Четири дена давав информации за својата улога и одговорности во текот на војната на Косово

По осумчасовното сослушување, четврти ден по ред, косовскиот претседател Хашим Тачи синоќа ја напушти зградата на Специјалното обвинителство во Хаг кога изјави дека одговорил на сите прашања од Специјалното обвинителство за време на војната во Косово и после тоа, за периодот што го покрива мандатот на Специјалното јавно обвинителство.

-Многу сум задоволен што имав можност четири дена да сведочам за сите прашања во врска со моите активности за време на војната и моите напори за мир, стабилност, развој и напредок. Во текот на овие четири дена бев во можност да дадам информации за мојата улога, моите одговорности за време на војната, им рече Тачи на новинарите и во директниот пренос на косовската телевизија.

Тој оцени дека станува збор за продуктивни сослушувања, додека сега останува на обвинителите и судиите да одлучуваат непристрасно.

-Ако го сторат тоа професионално, можат лесно да заклучат дека јас не сум извршил никакви воени злосторства, рече Тачи.

Тој рече дека војната на ОВК била праведна и за слобода и дека тие ја имале поддршката за тоа од целиот свет.