Супербогатите станаа уште побогати во 2024 година поради концентрацијата на капиталот

Бројот на доларски милионери во светот порасна за 2,6 отсто во 2024 година, но овој раст беше нерамномерен, со најмногу нови богаташи во САД, додека во Европа економската ситуација доведе до намалување на бројот на лица што можат да издвојат милион долари за инвестиции, покажува извештајот на меѓународната ИТ-консултантска компанија „Капџемини“.

Светскиот извештај за богатство за 2025 година, објавен на 4 јуни, прецизира дека зголемувањето на бројот на милионери главно се должи на ултрабогатите лица, чиј нето имот надминува 30 милиони долари, а нивниот број порасна за 6,3 отсто минатата година.

Физичките лица со најмалку еден милион долари, без да се пресметуваат недвижностите во кои живеат, уметничките колекции, долгорочната потрошувачка стока и сличните вредности, најмногу профитираа поради силниот пазар на акции и оптимизмот поврзан со развојот на вештачката интелигенција. Алтернативните инвестиции, како фондовите за ризичен капитал и криптовалутите, станаа редовен дел од инвестициските портфолија, според „Капџемини“.

Поволните каматни стапки и приносите на американската берза го поттикнаа збогатувањето во 2024 година, па бројот на милионери во САД порасна за 562.000, достигнувајќи 7,9 милиони. Во Европа, пак, бројот на милионери опадна за 2,1% поради економската стагнација во најголемите земји, особено во Германија, каде што се изгубени 41.000 милионери. Сепак, дури и во Европа, бројот на ултрабогатите порасна за 3,5%, што е одраз на зголемената концентрација на капиталот.

Во Азија и Пацификот, бројот на богати порасна за 2,7%, но со големи регионални разлики. Јапонија и Индија предводат со раст од 5,6%, додека во Кина бројот на милионери се намали за 1%. Во Латинска Америка, поради девалвација и фискална нестабилност, падот беше 8,5%, особено во Бразил (пад од 13,3%) и Мексико (пад од 13,5%). На Блискиот Исток, бројот на многу богатите се намали за 2,1% поради падот на цените на нафтата.

Истражувањето на научниот институт на „Капџемини“ опфати 71 земја, кои сочинуваат над 98 отсто од глобалниот БДП и 99 отсто од берзанските трансакции во светот, покривајќи ги Северна и Јужна Америка, Азиско-пацифичкиот регион, Европа и Блискиот Исток.