Суд во Мароко изрече три смртни казни за убиството на две скандинавски туристки

Суд за борба против терозимот во мароканскиот главен град денеска на три лица им изрече смртна казна за убиството на две скандинавски туристки во земјата во декември минатата година, пренесоа западните агенции.

Убиството беше извршено во име на терористичката организација Исламска држава, потсетуваат француските медиуми.

Еден од осудените е 25-годишниот радикализиран трговец Абделсамад Еџуд, кој призна дека го организирал убиството на двете жени, заедно со своите двајца соучесници, Јунес Узијад (27) и Рашид Афати (33).

Данкињата Луиза Јесперсен (24) и 28-годишната Норвежанка Марен Јуеланд беа убиени додека биле на екскурзија во оддалечениот регион во планините Атлас,што се наоѓаат во јужниот дел на Мароко.

Иако во оваа земја и натаму се изрекуваат смртни казни, во неа од 1993 година де факто се применува мораториум врз извршувањето на смртната казна, а во моментов има дебата дали ваквата пракса да се укине, забележуваат француските медиуми.

Во процесот што се води за убиството на младите Скандинавки им се суди на вкупно 24 лица, а дел од нив се осомничени за учество во подготовка на убиството, додека други за припадност кон џихадистичката ќелија. Останатите 21 осомничени добија казни од пет години до доживотен затвор.