Студентите од Правниот факултет во Ниш поднесоа кривична пријава против Вучиќ поради посетата на пациенти од Кочани во УКЦС

Студентите на Правниот факултет во Ниш денеска поднесоа кривична пријава до Вишото јавно обвинителство против претседателот на Србија, Александар Вучиќ, и градоначалникот на Ниш, Драгослав Павловиќ, бидејќи неовластено и спротивно на правилата влегле во одделението за интензивна нега во Универзитетскиот клинички центар во Белград каде што биле сместени повредените од пожарот во Кочани.

Како што објавија студентите на Инстаграм, предмет на пријавата се дејствија што содржат основи за сомнение дека се извршени кривични дела, загрозување на безбедноста, неовластено фотографирање, неовластено објавување и прикажување на туѓи досиеја, портрети и видеа и злоупотреба на службена положба.

Студентите објаснија дека се одлучиле на тој чекор бидејќи доволно долго чекале јавниот обвинител, како независен орган за кривична гонење, да ја препознае својата уставна и законска должност – да реагира на очигледно незаконското однесување на носителите на највисоките државни и локални функции. 

Тие потсетија дека на 17 март Вучиќ влегол во одделот за Интензивна нега на Универзитетскиот клинички центар на Србија, каде што биле лекувани повредените во пожарот во Кочани, а дека Павловиќ го сторил истото во Воената болница следниот ден.

„Двете посети беа организирани во присуство на фотографи и новинари, иако тие болнички единици се строго затворени, а нивната приватност и безбедноста на пациентите се заштитени со закон и медицинска етика“, се наведува во објавата.