Струшките пензионери ги подигнаа зголемените пензии

Околу 3.200 пензионери во Струга денеска ги земаа септемвриските пензии, повисоки за 621 денар.

Покрај големата гужва на банкарските шалтери и чекањето во редови, пенизонерите со насмевка го коментираат последното зголемување и поддршката што ја добиваат од Владата во изминатите години.

-  Она што ни го ветија пред неколку месеци и го исполнија. Денеска земав пензија поголема за околу 600 денари, што значително се забележува на сметката, вели пензионерот Јован Димоски.

И Велика Наумоска, пензионер од Струга го поздрави зголемувањето со очекување дека ќе биде изреализирано ветеното и за следната година.

-  Досега кога ќе ветеа и ни ги зголемуваа пензиите. Се надевам дека истото ќе го направат и за догодина, ни требаат пари за храна, лекови..., изјави Наумоска.

Со ова зголемување просечната македонска пензија изнесува 13.000 денари. Владата најави ново зголемување од 650 денари за окотомври 2016 година.