Столтенберг: Алијансата останува посветена на контролата на вооружување

Генералниот секретар на НАТО, Јенс Столтенберг денеска изјави оти Алијансата ќе остане целосно посветена на контролата на вооружување и разоружвање, додека подготвува одговор на руското распоредување ракети 9М729.

– НАТО беше единствен во однос на руското кршење на Договорот за контрола на ракетите со среден дострел. Ќе разговараме за одговорот на зголемувањето на бројот на руски конвенционални и нуклеарни ракети, посочи Столтенберг отворајќи го состанокот на министри за одбрана на земјите-членки во Брисел.

Тој потсети дека Алијансата во јуни минатата година усогласи балансиран и дефанзивен пакет мерки за да одговори на распоредувањето на руските ракети, а оти денеска ќе го разгледува целиот опсег на руски ракети со краток и среден дострел.

Столтенберг посочи и дека министрите ќе разговараат и за зголемување на трошоците за воените потреби.