Средба на Заев со германскиот специјален пратеник Хајндл

Претседателот на СДСМ Зоран Заев придружуван од заменик претседателката Радмила Шекеринска и генералниот секретар Оливер Спасовски, денеска се сретна со германскиот специјален пратеник за Македонија, Јоханес Хајндл, придружуван од амбасадорката на Германија Кристине Алтхаузер.

- Заеднички е ставот дека нема време за губење и дека е неопходно брзо решение за политичката криза, а тоа е прецизирање конкретни чекори за исполнување на двата клучни услова за брзи фер и демократски избори во Македонија и организација и спроведување слободни избори според Договорот од Пржино, стои во соопштението од СДСМ.

Заев посочил дека и за Избирачкиот список и за медиумите можен е договор во следните денови, ако за тоа постои политичка волја, бидејќи, се вели во соопштението, на маса се конкретни технички чекори што треба да се направат, а коишто може да не зависат од политичките партии. 

На средбата, соопшти СДСМ, било констатитирано дека Република Македонија почна да ги чувствува првите консеквенци од пролонгирањето на политичката криза и оти сите страни мора да ја покажат потребната иницијативност за отворените прашања, а со тоа и волја за регуларни предвремени парламентарни избори.

- Постои јасна согласност дека само фер, регуларни и демократски избори се опција за напредокот на Македонија нејзините граѓани, стои во соопштението од СДСМ.