Средба на владина делегација со претставници на Светска банка

Продлабочување на соработката меѓу земјите од Западен Балкан и поддршката што ја дава Светска банка беше тема на средбата што владина делегација во чиј состав е Кочо Анѓушев, заменик претседател на Владата задолжен за економски прашања и Драган Тевдовски, министер за финансии, попладнето во Софија со Кристалина Георгиева, главна извршна директорка на Светска Банка, придружувана од Сирил Милер, потпретседател на Светска Банка за регионот на Европа и Централна Азија и Линда Ван Гелдер, регионална директорка за Западен Балкан.

Од владината прес-служба инфомрираат дека делегацијата од Владата на Република Македонија на средбата го изразила цврстиот став на Владата за интензивирање на инфраструктурните проекти, како и за подобрување на поврзувањето во делот на трговијата, транспортот и информатичката технологија.

На средбата е изразена заедничка согласност на двете страни дека унапредувањето на соработката во последните месеци ќе продолжи и во иднина.

Средбата на делегацијата на Владата на Република Македонија со претставниците на Светска Банка на највисоко ниво се одржа во пресрет на утрешната Меѓународна конференција во Софија „Посилна регионална интеграција на Балканот“, на којашто е домаќин Светска Банка и на којашто ќе присуствуваат премиерите на Западен Балкан, за што вечерва од Брисел во Софија доаѓа и премиерот на Република Македонија, Зоран Заев.