Средба на Сиљановска Давкова со Вучиќ на Илинден во Св.Прохор Пчињски

Во манастирскиот комплекс Св.Прохор Пчињски утре ќе се сретнат претседателката на Република Северна Македонија Гордана Сиљановска Давкова и претседателот на Република Србија, Александар Вучиќ, јави дописникот на МИА од Белград.

Во соопштението од службата за соработка со медиумите на српскиот претседател се додава дека двајцата претседатели на 2-ри август на пладне заеднички ќе имаат обиколка на црквата во манастирскиот комлекс, по што српкиот претседател и македонската претседателка ќе одржат состанок, а потоа ќе имаат обраќање пред медиумите и присутните гости.

Претседателот на Србија на 23 јули телефонски разговарал со претседателката на Северна Македонија Сиљановска Давкова, кога меѓу останатото било договрено на Илинден заедничка посета на манастирот Прохор Пчињски.

- Срдечен разговор со претседателката @gordana_siljanovska_davkova за најважните прашања од нашите билатерални, а особено економските односи, како и за местото на Србија и Северна Македонија на агендата на проширувањето на Европската унија и взаемната поддршка на #ЕУ патот. Претседателката на Северна Македонија се заблагодари за помошта што Србија ја пружи во гаснењето на пожарот, а јас посочив дека важноста на регионалната соработка е во тоа што можеме да си помогнеме на најдобар и најбрз начин. Се договоривме заедно да го посетиме манастирот Прохор Пчињски на Илинден, што исто така ќе биде одлична можност за дополнително зајакнување на врските меѓу нашите два народи. Ја искористив приликата да ја поканам мојата почитувана колешка да ја посети Србија, за да конкретизирам некои од плановите кои ќе ја подигнат нашата соработка на повисоко ниво, напиша Вучиќ на својот Инстаграм профил