Средба на лидерот на ВМРО-ДПМНЕ со регионалниот директор на НДИ за Централна и Источна Европа

Актуелната политичка состојба во која се наоѓа Република Македонија и предизвиците со кои се соочува беа тема на разговор на денешната средба во Скопје меѓу претседателот на ВМРО-ДПМНЕ Никола Груевски и Роберт Бенџамин, регионален директор на Националниот демократски институт (НДИ) за Централна и Источна Европа.

Од страна на регионалниот директор Бенџамин, информираат од ВМРО-ДПМНЕ, беше реафирмирана поддршката која што во континуитет ја дава НДИ на политичките партии и институциите во земјава, а пред се на Собранието.

Ставот на НДИ во однос на специфичните прашања со кои се соочува државата, како што истакна Бенџамин е дека најодржливи се автентичните решенија кои би произлегле од релевантните домашни фактори.

На средбата беше поздравена досегашната соработка меѓу ВМРО-ДПМНЕ и НДИ со заклучок од двете страни дека постои можност за нејзино натамошно унапредување.

Регионалниот директор на НДИ презентираше и дел од проектите на кои што ќе работи институтот во иднина изразувајќи надеж дека како и досега тие ќе бидат од полза на политичките субјекти во земјава.