СПМ со честитка за Божиќ до православните верници

До поглаварот на Македонската Православна Црква–Охридска Архиепископија, Митрополит Скопски, Архиепископ Охридски и Македонски и на Јустинијана Прима, г.г. Стефан

Во овие празнични денови лично и во име на Социјалистичката партија на Македонија Вам и на членовите на Светиот архиерејски синод, на целото свештенство и монаштво и на сите православни верници и македонски граѓани со особено внимание го честитам Рождеството Христово Божиќ, славењето на љубовта, вистината, човечноста и хуманоста.

Бадниковата вечер и Божиќ носат топлина во нашите домови, а семејствата и ближните ги исполнуваат со добра мисла, милосрдие и благослов. Тие нè упатуваат на вистинските вредности на љубов, добрина и грижа за нашите ближни, пријателите и нашите соседи.

Затоа да ги споделиме со оние кои имаат помалку, да им помогнеме на  немоќните и на обесхрабрените.

Посакувам заеднички да ги негуваме единството и искреноста, спокојно продолжувајќи во градењето на мирот, разбирањето и толеранцијата, важни за развојот на општеството и на нашата Држава Македонија.

Во овие тешки времиња нам заедништвото и слогата ни се потребни како никогаш до сега, а тие бараат да ги надминеме поделбите, да се свртиме кон она што не поврзува и сплотува.

Божиќната светлина е водилката на секој од нас на нашиот пат кон општиот и личниот успех и среќа.

Затоа што успехот на поединецот е и успех на општеството и на државата.

На сите македонски граѓани православни христијани кои го слават Божиќ им посакувам топлина и љубов во семејствата, радост и среќа во текот на целата година.

Христос се роди!

Љупчо Димовски,

Претседател на Социјалистичката партија на Македонија