Спасувачка акција во Вардар - се бара исчезнато лице

Дирекцијата за заштита и спасување (ДЗС) ја информира јавноста дека по официјално барање на Полициската станица (ПС) Гостивар, веднаш се активирани и упатени стручни тимови на терен за пронаоѓање на исчезнато лице, за кое постојат индиции дека се наоѓа во водите на реката Вардар на подрачјето на Гостивар.

Операцијата на терен се одвива под директно водство на заменикот-директор на Дирекцијата за заштита и спасување, Кашмир Салиу. 

Во акцијата за пребарување и спасување се вклучени специјализираните сили на ДЗС, поточно припадници на Тимот за брз одговор (ТБО) за спасување на води, како и соодветна логистика од Подрачното одделение на ДЗС - Гостивар.  
Екипите предводени од заменикот-директор Салиу работат во тесна координација со полициските службеници од ОВР Гостивар и локалните служби, со цел што побрзо лоцирање на лицето.

Пребарувањето се одвива интензивно по текот на реката Вардар, почнувајќи од критичните точки во градот па сè до низводните подрачја. 

И покрај моменталните услови на теренот и спецификите на речното корито, екипите на ТБО предводени од заменик директорот Кашмир Салиу, ќе останат максимално ангажирани сè додека не се заврши целосната операција.

Дирекцијата за заштита и спасување апелира до граѓаните на Гостивар и околните населени места, доколку располагаат со какви било информации поврзани со исчезнатото лице или забележат нешто долж речното корито, веднаш да пријават на дежурните броеви во полицијата или до надлежните служби за заштита и спасување.

За сите нови сознанија од теренот, јавноста и медиумите ќе бидат навремено известени.