Снегот во Центар постојано се чисти, до 8 часот фрлени 14 тони сол

Екипите на општина Центар од раните утрински часови излегоа на терен и го чистат снегот по улиците и тротоарите, кои се во надлежност на општината. На улиците оперираат четири специјални возила-камиони, соларки со нож и соларка за чистење снег. На приоритетните места се вклучува и специјална машина за рачно чистење на голомразни површини.

Како што информира Општината, од 3 часот до 8 часот утрово се фрлени 14 тони сол. Нема застој  на сообраќајот по улиците и граѓаните можат нормално да се движат.

Набавени се 250 тони сол и е ангажирана фирма за одржување на коловозите и тротоарите. 

Општина Центар апелира сите сопственици и корисници на јавни објекти, веднаш да почнат со чистење на снегот на отворените простори пред јавните објекти за да се обезбеди  непречен пристап.