Словенија ги замрзна цените на горивата

Со цел да се олесни состојбата на пазарот на горива, словенечката влада одреди максимални малопродажни цени на горивата.

-Словенците од утре ќе треба да платат 1.503 евра за литар безоловен бензин од 95 октани, а за литар дизел 1.541 евро, изјави министерот за економија Здравко Почивалшек

Мерката ќе важи 30 дена, јавуваат словенечките медиуми.

Министерот за економија Здравко Почивалшек пред новинарите изјави дека Владата одлучила да ја смири состојбата во делот на моторните горива, па ја поставила највисоката малопродажна цена во корист на граѓаните и стопанството.

Тој изјави дека во моментов нема потреба од ослободување на резервите на нафтени деривати.

Почивалшек истакна дека во Словенија има доволно количество гориво, така што нема страв од недостиг.Тој рече и дека овие цени се слични на оние што ги имале досега, можеби и малку пониски.

– Во моментов цените во Австрија и Хрватска се малку над словенечките, во Унгарија значително под словенечките и во Италија значително над нашите – рече министерот.

Премиерот на Словенија, Јанез Јанша, претходно ја најави ваквата одлука на Владата дека за неполни седум дена нема да има трето поскапување.