Словенечката полиција заплени сто килограми кокаин од Бразил

Словенечката полиција заплени во складиште во словенечка фирма од местото Зрече сто килограми кокаин, соопшти денеска полицијата. 

Во истрагата словенечката полиција соработувала со повеќе земји, а се верува дека запленетата дрога „на улица“ би достигнала вредност од околу пет милиони евра.

Дрогата ја пронашле во понеделникот вработени во складиштето во фирмата „Сватикомет“ и тоа во контејнер со минерален алуминиум оксид, кој фирмата го користи за производство, по што ги известиле надредените, а тие полицијата. 

Контејнерот бил нарачан од германска фирма, која соработува со компанија од Бразил.

- Пратката со околу сто килограми дрога, за која е утврдено дека е кокаин, дошла од бразилското пристаниште Сао Паоло, изјави шефот на криминалистичката служба на полицијата во Цеље, Дамијан Турк. 

Утврдено е дека контејнерот кон крајот на март стигнал во Копар, а при царинскиот преглед не било утврдено нешто сомнително.