Скопската Брза помош со многу работа, но со малку кадар

Во едно деноноќие од 5 до 6 сообраќајни несреќи со интервенција на скопската Брза помош. Повредени пешаци и возачи на тротинети како и верижни судари на автомобили се повиците до 194. Од службата алармираат дека овој месец се постојано по улиците и покрај апелите за внимателно возење и преминување на пешачките премини.

-Доста чести ни се овој период моторџиите и тротинетите, тие се малку потешки и покомплицирани состојби каде интервенираме. Нема правило, но знаат некојпат и навечер да има повеќе сообраќајќи особено за викенд и празници кога се и под дејство на алкохол, вели д-р Александра Пејовска, од скопска Брза помош. 

Покрај зачестените сообраќајни нссреќи, овој период на променливо време на 194 помош бараат и оние со нагло варирање на крвниот притисок кои може да добијат совет, но во зависност од симптомите да бидат посетени од Брза помош.

А на овој зголемен број на повици, службата е десеткувана и во смена има само 5 екипи. Состојбата со недоволен број на кадар не е од сега, но вработените аламрираат дека мора итно да има вработувања, кои сега биле одложени поради распишувањето на локалните избори.

-Екстремно е тешко, пробуваме да менаџираме некако со последни сили. Пшосебно како сега што сме во овој период – имаше пензионирања како и во секоја друга институција, специјалисти си отида да си работат во специјалноста, сега сме во многу тешка состојба. Ги замолувам граѓаните тоа што не е за итна помош да ги консултираат матичните бидејќи тие се за нив тука, а она што не можат матичните тогаш да побараат Брза помош, вели Пејовска,

Според менаџментот на Здравствен дом Скопје, состојбата во Скопје може да се стабилизира со 10 до 15 нови тимови, што пак, значи вработувања на лекари, медицински сестри и возачи кои ги сочинуваат екипите.