Сириски бегалец е првата идентификувана жртва од пожарот во Лондон

Сирискиот бегалец во Британија,  Мохамед Алхајали (23) е првата идентификувана  жртва од катастрофалниот пожар во Лондон, во кој досега се регистрирани 17 загинати лица.

Тој и неговиот брат живееле на 14 кат во станбениот облакодер „Гренфел Тауер“ во западнот дел од британскиот главен град.

Веднаш по избувнувањето на пожарот, двајцата браќа се стрчале низ скалите кон подножјето на оваа 24 катница, но Мохамед одлучил да се врати, за да им се јави на своите родители во Сирија, а потоа останал заглавен во станот, поради брзото ширење на пожарот.

Според соопштението на хуманитарната организација од Лондон,  која се грижи за сириските бегалци во Британија,  Мохамед  два часа зборувал постојано по телефон со другар Сирија, чекајќи да биде спасен од пожарникарите, но силната огнена стихија не дозволила тие да стигнат до него.

Неговиот брат, успеал да се спаси од „огнениот облакодер“.

Двајцата браќа дошле во Британија, во 2014 година, бегајќи од воените судирања во Сирија. Загинатиот брат, студирал на еден од градежните факултети на лондонските универзитети.

Претставник на спасувачките екипи изјави дека покрај Мохамед Алхајали,  се идентификувани и шест други жртви, но дека не се избрзува со соопштувањето на нивните имиња, стравувајќи од можната грешка.

Спасувачите и пожарникарите се уште не го знаат точниот број на жртвите, но се стравува  дека конечниот биланс од  големиот пожар , ќе биде многу поголем.

Неколку денови по големата несреќа, се отфрла секаква можност дека би можело да се најдат преживеани, а експертите за идентификација предупредуваат дека може да се случи некои од жртвите никогаш да не бидат идентификувани.

Британскиот премиер Тереза Меј објави покренување јавна истрага за катастрофата, со која ке раководи судија, што наскоро ќе биде именуван.

Истрагата треба да одговори за тоа, што ја предизвика огнената стихија и нејзниното ширење низ облакодерот со голема брзина, како и дали обновата и реконструкцијата на високата станбена зграда,  била спроведена според безбедносните стандарди.