Синер го одбрани трофејот на Австралија Опен

Јаник Синер владее со светскиот тенис и ја одбрани титулата од Гренд слем турнирот во Мелбурн откако победи во меч против Александар Зверев со 3:0 (6:3, 7:6, 6:3).

За Италијанецот ова е трет трофеј од ,,големата четворка".

Светскиот рекет број 1 докажа дека моментално е многу тешко да биде победен во финалиња на големите турнири.

Минатосезонскиот победник на Австралија Опен и УС Опен имаше голем ривал во Зверев, но деталите, па дури и среќата, одлучија во корист на Италијанецот.

Германецот играше добро во поголемиот дел од мечот, особено кога сервираше, но Синер моментално е најдоминантниот АТП играч во размена на удари, а тоа се покажа како непремостлива пречка за Зверев оваа недела пред распродадената публика во ,,Род Лејвер Арена".