Штипскиот Црвен крст донираше на семејство во селото Лакавица

Тимот на Црвен крст Штип денескаго посети единаесет членото семејство во село Лакавица, на коешто домот до темел им изгоре во пожар. Викторија Милановска, секретар на Општинската организација на Црвен крст-Штип, вели дека на темелите од некогашниот дом, чиј покрив го делеа три генерации, периодов ќе се надградува ново живеалиште, процес за кој е потребна помош од сите граѓани кои се во состојба да дадат свој придонес. 

– Денешната донација за ова семејство се состоеше во трајни прехранбени продукти, хигиенски средства, бебешки аксесоари, нови ќебиња и постелнина и облека селектирана според возраста на корисниците, рече Милановска.

Општинската организација на Црвен крст-Штип упатува апел до сите сограѓани кои имаат мебел и покуќнина кои не ги користат, како и градежен материјал, неделава да ги донираат во просториите на Црвен крст  секој работен ден од 08:00 до 16:00 часот. На листата желби на најмладите членови на семејството се најдоа и два училишни ранци за машки деца од шест и седум години, кукла и пелени за две месечното бебе.