Штетите од земјотресот во Турција надминаа 100 милијарди долари

Материјалната штета предизвикана од земјотресот во Турција надминува 100 милијарди долари, покажува прелиминарната пресметка на Светска банка, ОН, Европската унија и Владата во Анкара.

„Еден месец по земјотресот во Турција, во кој загинаа повеќе од 46.000 луѓе, веќе е јасно дека само материјалната штета ќе биде повеќе од 100 милијарди долари“, изјави Луиза Винтон, шефица на Програмата за развој на ОН во Турција.

Таа на видео-конференција на ОН во Женева од Газиантеп, Турција, рече дека „трошоците за реконструкција и сè што оди со подобра и поеколошка реконструкција очигледно ќе ја надмине таа сума“.

„Проценките и натаму се засноваат на прелиминарни податоци, но износот од 100 милијарди долари за штета ќе биде претставен на донаторската конференција за реконструкција на 16 март во Брисел“, рече Винтон.

Таа изрази „разочарување и тага“ поради недостигот на дарежливост од донаторите, укажувајќи дека досега се исполнети само 9,6 отсто од помошта од 1 милијарда долари итно побарана на 16 февруари.

Речиси 46.000 луѓе загинаа, а 105.000 беа повредени во земјотресот во Турција од 6 февруари, со јачина од 7,8 степени и последователниот од 7,6 степени, но билансот сè уште не е целосен.

Во 11 од 81 провинција во Турција, 214.000 згради беа уништени или оштетени, од кои некои беа високи повеќе од 10 ката.

Во тие земјотреси загинаа речиси 6.000 луѓе и во соседна Сирија, каде што исто така материјалната штета е голема.